Sogn Hugo, uestg e confessur.
pdf: cheu l’entira historia
Ils 1 d’avrel: Sogn Hugo, uestg e confessur
Sogn Hugo ei naschius en Frontscha damaneivel dil marcau da Valenza. Da siu bab che veva surviu biars onns al retg dalla Frontscha e pli tard ius en claustra dils Cartusians, haveva el da pign ensi survegniu ina buna educaziun. El ei lu daventaus augsegner, lu vegnius canoni e pli tard encunter sia veglia consecraus da papa Gregori il siatavel per uestg da Grenoble. Da quei temps fuva igl uestgiu da Grenoble en in miserabel stan, pertgei la malgiustia haveva surpriu maun. Il sogn uestg plunscheva di e notg tier Diu, urava, giginava e fagieva grevas penetienzias per urbir da Diu agid da puder remediar quei mal. Ord quels motivs ha el suenter dus onns bandunau discusamein igl uestgiu per viver en ina claustra da sogn Benedetg sco conventual. Sin camond da papa Gregori VII. ha el lu puspei stuiu turnar a Grenoble en siu uestgiu che fuva en quei temps ius fetg en decadenza. Ils spirituals maridavan puplicamein ed il pievel viveva senza cardientscha. Per reformar ton schliet sedepurtar, ha ei tuccau a sogn Hugo da luvrar e pitir bia. Aunc avon sia mort ha el lu pudiu reformar e disciplinar las pleivs da siu uestgiu. Uestg Hugo ei staus da grond néz a l’entira Baselgia catolica, pertgei cun siu agid ha sogn Bruno fundau igl onn 1084 a Grenoble il sogn uorden dils paders Cartusians. El era gests cun tuts e pudeva buca vertir sch‘enzatgi plidava sur dil proxim. El parteva quei chel veva culs paupers e spargnava neginas fadigias per metter en perinadad quels che stevan en carplina. Ses priedis purtavan grond fretg, pertgei ch’el mussava cun fatgs quei ch’el meteva avon cun plaids. Pliras ga ein gronds pucconts entras ses priedis vegni taluisa muentai, ch’els seturpegiavan buca da confessar publicamein e dad ault lur puccaus. Ina veta schi virtuusa e sontga ha Diu buca vuliu schar esser senza cruschs. Muort sias strentgas penetienzias e grevas mortificaziuns, ha el pitiu grondas dolurs dil tgau e dil magun. Sper quei fuva el aunc mulestaus da grevas tentaziuns che han cuzzau pli che 40 onns. Talas tentaziuns ha el adina dumignau cun crer che Diu laschi daventar il mal, per ch’ins sappi trer ordlunder il bien. Pervia dallas dolurs dil tgau ha el la finala piars la memoria dallas caussas dil mund. El enconuscheva buca pli la glieud e seregurdava da negins fatgs temporals. Denton da caussas spiritualas saveva el plidar, deva buns cussegls, nizeivlas ductrinas per il beinstar dallas olmas. Psalms, himnis ed oraziuns veva el perfetgamein en memoria e sesurveva cuntinuadamein da quellas devoziuns. Suenter che uestg sogn OHhhhhhhHHHHugo ha giu suffriu cun pazienzia grevas dolurs corporalas e mulestas dil spért, sch’ei la beada ura dalla mort vegnida neutier. La damaun dils 1 d’avrel 1132, suenter esser staus 52 onns uestg, ha el rendiu si’olma al Scaffider en la vegliadetgna da 80 onns. Siu tgierp ei staus tschun dis en bara, pertgei in grond pievel vegneva neutier per reverir e bitschar il sogn che …